ទីស្ដីការក្រសួងមហាផ្ទៃ៖ នៅព្រឹក​ ថ្ងៃព្រហស្បតិ៍្ត​ ទី២២ ខែតុលា ឆ្នាំ២០២៦​ ឯកឧត្ដម​ សំរិទ្ធ​ឌីឯកឧត្ដម​ ហ៊ូ​ សាគុណ​​ និងឯកឧត្ដម ថង​ សាវុន​ រដ្ឋលេខាធិការ​ ក្រសួង​មហាផ្ទៃ​ បានអញ្ជើញជាគណៈអធិបតីបតីដឹកនាំកិច្ចប្រជុំរាយការណ៍អំពីវឌ្ឍនភាព និងលទ្ធផលការងារប្រចាំខែតុលា និងលើកទិសដៅបន្តខែវិច្ឆិកា ឆ្នាំ២០២៦ របស់នាយកដ្ឋានកណ្តាលនគរបាលព្រំដែន នៃអគ្គស្នងការដ្ឋាននគរបាលជាតិ​ ដោយមានការអញ្ជើញចូលរួម​ពី​ ឯកឧត្ដម​ អនុរដ្ឋលេខាធិការ​ ទីប្រឹក្សា​ក្រសួង​មហាផ្ទៃ​ អគ្គស្នងការរង​ ប្រធានសេនាធិការដ្ឋាន​ អនុប្រធាន​ ប្រធាន​នាយកដ្ឋានកណ្តាលនគរបាលព្រំដែន​ ព្រមទាំង​មន្ត្រី​ពាក់ព័ន្ធ​ជាច្រើន​រូបផងដែរ​ ។ 

ឯកឧត្ដម​ គណៈអធិបតីប្រធាន​​អង្គប្រជុំបានលើកឡើងថាកិច្ចប្រជុំនេះបានផ្តោតលើការពិនិត្យ និងវាយតម្លៃលទ្ធផលការងារដែលនាយកដ្ឋានកណ្តាលនគរបាល​ព្រំដែនសម្រេចបានក្នុងខែតុលា ឆ្នាំ២០២៦ ព្រមទាំងពិភាក្សាអំពីបញ្ហាប្រឈម និងចំណុចដែលត្រូវយកចិត្តទុកដាក់ក្នុងការអនុវត្តតួនាទី ភារកិច្ច និងការទទួលខុសត្រូវរបស់អង្គភាព។ ទន្ទឹមនឹងនេះ អង្គប្រជុំក៏បានពិភាក្សាលើការកំណត់ទិសដៅ និងអាទិភាពការងារសម្រាប់ខែវិច្ឆិកា ដើម្បីបន្តពង្រឹងប្រសិទ្ធភាពការងារគ្រប់គ្រង និងការពារសន្តិសុខតាមបណ្តោយព្រំដែន សំដៅរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ។

ចុងបញ្ចប់នៃ​កិច្ចប្រជុំនេះដែរ​ ឯកឧត្ដម​ គណៈអធិបតី​ រដ្ឋលេខាធិការ​ ​គណៈអង្គប្រជុំបានស្មើអង្គភាពពាក់ព័ន្ធត្រូវបន្តយកចិត្តទុកដាក់អនុវត្តការងារតាមផែនការដែលបានដាក់ចេញ ពង្រឹងស្មារតីទទួលខុសត្រូវ និងសហការគ្នាដោះស្រាយបញ្ហាប្រឈមនានា ដើម្បីបំពេញភារកិច្ចការពារបូរណភាពទឹកដី និងអធិបតេយ្យភាពជាតិឱ្យបានល្អប្រសើរ ស្របតាមគោលនយោបាយ និងទិសដៅដឹកនាំរបស់ក្រសួងមហាផ្ទៃ និងអគ្គស្នងការដ្ឋាននគរបាលជាតិ។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ