ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អញ្ជើញជាអធិបតីក្នុងពិធីបើកវគ្គបណ្តុះបណ្តាលមន្រ្តីនគរបាលយុត្តិធម៌ លើកទី៣ សម្រាប់មន្រ្តីនៃអគ្គនាយកដ្ឋានអន្តោប្រវេសន៍ នៅបណ្ឌិត្យសភានគរបាលកម្ពុជា

នៅព្រឹកថ្ងៃសុក្រ ទី១៤ ខែសីហា ឆ្នាំ២០២៦ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញជាអធិបតីក្នុងពិធីបើកវគ្គបណ្តុះបណ្តាលមន្រ្តីនគរបាលយុត្តិធម៌ លើកទី៣ សម្រាប់មន្រ្តីនៃអគ្គនាយកដ្ឋានអន្តោប្រវេសន៍ ចំនួន៣៩៨នាក់ នារី ចំនួន៣៥នាក់ ដែលមានការអញ្ជើញចូលរួមពី ឯកឧត្តមឧត្តមសេនីយ៍ឯក អនុប្រធានបណ្ឌិត្យសភា សាស្ត្រាចារ្យ គ្រូនគរបាល ប្រធាន-នាយកអង្គភាពចំណុះ និងមន្ត្រីពាក់ព័ន្ធមួយចំនួន នាសាល សម្តេចអគ្គមហាធម្មពោធិសាល ជា ស៊ីម (អគារ ខ-B) នៃបណ្ឌិត្យសភានគរបាលកម្ពុជា។

ជាកិច្ចដំបូង តាងនាមថ្នាក់ដឹកនាំបណ្ឌិត្យសភា ឯកឧត្តមនាយឧត្តមសេនីយ៍ ប្រធានគណៈអធិបតី បានថ្លែងកោតសរសើរចំពោះកិច្ចខិតខំប្រឹងប្រែងបំពេញការងារដោយស្មារតីទទួលខុសត្រូវខ្ពស់របស់អង្គភាពគ្រប់គ្រងវគ្គ មន្ទីរចាត់ការ និងអង្គភាពពាក់ព័ន្ធ ដែលបានបង្កលក្ខណៈងាយស្រួលឱ្យការរៀបចំវគ្គសិក្សានេះ  អាចចាប់ផ្តើមដំណើរការបាន ស្របតាមចំណារឯកភាពដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

ទន្ទឹមនេះ ឯកឧត្តមនាយឧត្តមសេនីយ៍ ក៏សូមថ្លែងអំណរគុណយ៉ាងជ្រាលជ្រៅចំពោះអគ្គនាយកដ្ឋានអន្តោប្រវេសន៍ ដែលបានចាត់បញ្ជូនមន្ត្រីនគរបាលមកសិក្សា-ហ្វឹកហាត់ តាមការជូនដំណឹងរបស់បណ្ឌិត្យសភានគរបាលកម្ពុជា។

ក្នុងឱកាសនោះ ឯកឧត្តមនាយឧត្តមសេនីយ៍ បានថ្លែងឱ្យដឹងថា វគ្គនេះ ពិតជាបានឆ្លើយតបទៅតាមតម្រូវការនិងសំណូមពររបស់អគ្គនាយកដ្ឋានអន្តោប្រវេសន៍ ដើម្បីឱ្យមន្ត្រីក្រោមឱវាទមានលក្ខណសម្បត្តិគ្រប់គ្រាន់ក្នុងការប្រឡងយកសញ្ញាបត្រជាន់ខ្ពស់និងទទួលសម្បទាជាមន្រ្តីនគរបាលយុត្តិធម៌ ស្របតាមក្រមនីតិវិធីព្រហ្មទណ្ឌនៃព្រះរាជណាចក្រកម្ពុជា ដែលបានកំណត់។

ពាក់ព័ន្ធនឹងវគ្គបណ្តុះបណ្តាលនេះ ឯកឧត្តមនាយឧត្តមសេនីយ៍ ប្រធានគណៈអធិបតី បានជម្រាបជូនសិក្ខាកាមទាំងអស់ជ្រាបដែរថា ដើម្បីរក្សាបាននូវវប្បធម៌គុណភាពនិងក្នុងគោល បំណងចង់ឱ្យសិក្ខាកាមទាំងអស់មានសមត្ថភាព ក្រោយពេលបញ្ចប់ការសិក្សា បណ្ឌិត្យសភាបានប្រកាន់ខ្ជាប់នូវជំហររបស់ខ្លួនក្នុងការគ្រប់គ្រង ដូចខាងក្រោម៖

ទី១- អនុវត្តគោលការណ៍៣យ៉ាង គឺគោលការណ៍សមធម៌ គោលការណ៍មិនលម្អៀង និងគោលការណ៍គុណភាព «ត្រូវរៀនឱ្យចេះ មិនមែនគ្រាន់តែរៀនឱ្យចប់នោះទេ» ហើយ «គុណភាពមិនអាចសម្របសម្រួលបានឡើយ»។

ទី២-ការអនុវត្តវិធីសាស្ត្រវាយតម្លៃការសិក្សា ក្នុងរយៈពេលសិក្សា គឺទី១ ការវាយតម្លៃជាប្រចាំ និងទី២ ការវាយតម្លៃសរុប។ នៅពេលបញ្ចប់វគ្គ សិក្ខាកាមដែលទទួលបានពិន្ទុសរុបចាប់ពី៦០% ឡើងទៅ ទើបចាត់ទុកថាទទួលបានជោគជ័យក្នុងការសិក្សានិងមានសិទ្ធិប្រឡងយកសញ្ញាបត្រជាន់ខ្ពស់នគរបាលយុត្តិធម៌។

ជាចុងក្រោយ ឯកឧត្តមនាយឧត្តមសេនីយ៍ បានមានមតិផ្តាំផ្ញើមួយចំនួនដល់សិក្ខាកាម ដូចខាងក្រោម៖

– ត្រូវអនុវត្តឱ្យបានខ្ជាប់ខ្ជួននូវបទបញ្ជាផ្ទៃក្នុងសម្រាប់សិក្ខាកាមនិងសេចក្តីណែនាំពាក់ព័ន្ធ ដែលកំណត់ដោយបណ្ឌិត្យសភានគរបាលកម្ពុជា

– ត្រូវយកចិត្តទុកដាក់សិក្សា-ហ្វឹកហាត់ ទាំងក្នុងថ្នាក់និងក្រៅថ្នាក់

– ត្រូវគោរពវិន័យសិក្សា វិន័យប្រឡង និងវិន័យទូទៅ ឱ្យបានល្អប្រសើរ និង

– ត្រូវប្រកាន់ខ្ជាប់នូវទស្សនៈ រៀនឱ្យចេះ មិនមែនគ្រាន់តែរៀនឱ្យចប់នោះទេ។

ប្រភព៖ បណ្ឌិត្យសភានគរបាលកម្ពុជា