បន្ទាយមានជ័យ ៖ នៅល្ងាចថ្ងៃទី២៥ ខែកញ្ញា ឆ្នាំ២០២៦ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពរដ្ឋបាលខេត្ត អមដំណើរដោយលោក លៀម សុដា លោក ហ៊ឹល រ៉ាយ៉ា អភិបាលរងខេត្ត លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ព្រមទាំងអធិការដ្ឋាននគរបាល និងកងរាជអាវុធហត្ថក្រុងប៉ោយប៉ែត បានអញ្ជើញចុះពិនិត្យមើលស្ថានភាពជាក់ស្ដែងនៅទីតាំងភូមិសាស្ត្រក្រុងប៉ោយប៉ែត ដែលទទួលរងផលប៉ះពាល់ដោយសារជំនន់ទឹកភ្លៀងដែលកំពុងបន្តរធ្លាក់មកជាប់ៗគ្នាដោយសារអាកាសធាតុប្រែប្រួល។ ក្នុងការចុះពិនិត្យជាក់ស្ដែងដល់ទីតាំងដែលត្រូវបានជន់លិច ឯកឧត្ដម អភិបាលខេត្ត ក៏បានធ្វើការណែនាំ ទៅកាន់បងប្អូនប្រជាពលរដ្ឋនៅក្នុងមូលដ្ឋានដែលប្រឈមជាមួយនឹងជំនន់ទឹកភ្លៀង ត្រូវមានស្មារតីប្រុងប្រយ័ត្នឱ្យបានខ្ពស់ និងសូមធ្វើការបំលាស់ទីទៅកាន់ទីទួលមានសុវត្ថិភាពឱ្យបានទាន់ពេលវេលា។ មួយវិញទៀត ឯកឧត្តម ក៏បានអំពាវនាវដល់ប្រជាពលរដ្ឋបង្កេីនការប្រុងប្រយ័ត្នចំពោះសត្វអាសិរពិសផ្សេងៗជាពិសេសត្រូវប្រយ័ត្នកូនចៅតូចៗកុំបណ្ដែតបណ្ដោយឱ្យលេងទឹក ព្រោះអាចប្រឈមជាមួយនឹងគ្រោះថ្នាក់លង់ទឹកជាយថាហេតុណាមួយកេីងមានឡេីង៕ -