ទីស្ដីការ​ក្រសួង​មហាផ្ទៃ​៖​ ព្រឹកថ្ងៃចន្ទ ទី១៩ ខែតុលា ឆ្នាំ២០២៦ ឯកឧត្តម ប៊ុន ហុន និងឯកឧត្តមសន្តិបណ្ឌិត គៀត ច័ន្ទថារិទ្ធ រដ្ឋលេខាធិការក្រសួងមហាផ្ទៃ បានអញ្ជើញជាសហប្រធានដឹកនាំ​កិច្ចប្រជុំស្តីពីការគ្រប់គ្រងនិងកិច្ចដំណើរការប្រព័ន្ធវាយតម្លៃហានិភ័យអ្នកដំណើរតាមផ្លូវអាកាស​ ដោយមានការអញ្ជេីញចូលរួមពី​ ឯកឧត្ដម​ អនុរដ្ឋលេខាធិការ​ ប្រធានក្រុមប្រឹក្សានីតិកម្ម​ អគ្គនាយក​រង​ ប្រធាន​នាយកដ្ឋាន​ អនុប្រធាន​នាយកដ្ឋាន​ នាយ​ នាយរង​ការិយាល័យ​ ព្រមទាំង​មន្ត្រី​ជំនាញ​ពាក់ព័ន្ធ​ជាច្រើន​រូប​ផង​ដែរ​ ។ 

ឯកឧត្ដម​ រដ្ឋលេខាធិកា​រ​ បានមានប្រសាសន៍ថាកិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យ និងពិភាក្សា​អំពីសេចក្ដី​ព្រាងអនុក្រឹត្យស្តីពីការគ្រប់គ្រង ការអនុវត្ត និងដំណើរការប្រព័ន្ធវាយតម្លៃហានិភ័យអ្នកដំណើរតាមផ្លូវអាកាស ព្រមទាំងពិនិត្យលទ្ធភាពក្នុងការពង្រឹងប្រសិទ្ធភាពនៃការប្រើប្រាស់ប្រព័ន្ធ ដើម្បីគាំទ្រដល់ការងារគ្រប់គ្រង និងត្រួតពិនិត្យអ្នកដំណើរ សំដៅលើកកម្ពស់សន្តិសុខ សុវត្ថិភាព និងប្រសិទ្ធភាពនៃការគ្រប់គ្រងការធ្វើដំណើរតាមផ្លូវអាកាស​ ។

ក្នុងឱកាសនោះដែរ​ ឯកឧត្ដម​ រដ្ឋលេខាធិកា​រ សហប្រធានអង្គប្រជុំបានផ្លាស់ប្តូរយោបល់ និងពិភាក្សាលើបញ្ហាប្រឈមនានាពាក់ព័ន្ធនឹងការអនុវត្តប្រព័ន្ធ ការសម្របសម្រួលការងាររវាងអង្គភាពជំនាញ និងការពង្រឹងកិច្ចសហការក្នុងការផ្លាស់ប្តូរព័ត៌មាន ស្របតាមតួនាទី និងភារកិច្ចរបស់អង្គភាពនីមួយៗ ដើម្បីធានាឱ្យការគ្រប់គ្រង និងដំណើរការប្រព័ន្ធប្រព្រឹត្តទៅដោយរលូន មានប្រសិទ្ធភាព និងឆ្លើយតបបានទាន់ពេលវេលាចំពោះតម្រូវការជាក់ស្តែង​ ។​ ជាមួយគ្នានេះ អង្គប្រជុំក៏បានផ្តោតលើសារៈសំខាន់នៃការពង្រឹងសមត្ថភាពមន្ត្រីជំនាញ ការប្រើប្រាស់បច្ចេកវិទ្យា និងការអនុវត្តនីតិវិធីពាក់ព័ន្ធឱ្យបានត្រឹមត្រូវ ដើម្បីរួមចំណែកក្នុងការបង្ការ ទប់ស្កាត់ និងគ្រប់គ្រងហានិភ័យដែលអាចកើតមានពាក់ព័ន្ធនឹងការធ្វើដំណើរតាមផ្លូវអាកាស​ ។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ